Најмалку 19 лица загинаа, а 10 се водат како исчезнати по обилните дождови и невремето што предизвикаа сериозни поплави и свлечишта во делови од Индија и соседен Непал, соопштија индиските власти.
Најтешко погодена е индиската сојузна држава Утар Прадеш, каде во последните 48 часа животот го загубија 15 лица, а петмина се повредени. Невремето оштети 117 куќи, зафаќајќи повеќе од 60 области. Според официјалните податоци, во периодот од 24 часа заклучно со саботата, во делови од оваа сојузна држава биле измерени врнежи кои биле 19 пати поголеми од вообичаените.
Во соседен Непал, три деца и една жена ги загубија животите кога свлечиште затрупа куќа додека семејството спиело во селото Ниши Кола, во округот Баглунг. Дополнително, 10 непалски работници се водат како исчезнати откако лавина го затрупа нивниот камп во планинскиот дел на северниот округ Мананг, додека поставувале шатори за странски планинари кои не биле присутни во моментот на несреќата.
Како одговор на кризата, непалските власти издадоа предупредување за можни ненадејни поплави во 49 од вкупно 77 окрузи. Во повеќе од половина од нив постои висок ризик од поплави и поројни надојдени води, додека водостоите на големите реки и нивните притоки и понатаму продолжуваат да растат.