Рускиот претседател Владимир Путин изјави дека преговарачкиот процес за решавање на кризата во Украина во моментов е во застој и нагласи дека секој иден дијалог мора да донесе конкретни резултати.
Говорејќи на прес-конференција по самитот на Шангајската организација за соработка (ШОС) во Бишкек, Киргистан, Путин посочи дека Москва е отворена за сите што можат да придонесат во процесот, но не поддржува средби без јасна цел.
„Секои преговори за Украина мора да бидат исполнети со некаква содржина. Ако некој може да придонесе за тоа, Москва нема ништо против тоа“, рече Путин.
Тој додаде дека формата на разговорите мора да има конкретна поента.
„Единственото нешто што не би го сакале е сè да се одвива бесцелно“, истакна рускиот претседател.
Оценувајќи ја моменталната состојба на дипломатскиот план, Путин потенцираше дека разговорите не се одвиваат со посакуваната динамика.
„Процесот на преговори за решавање на украинската криза сега е замрзнат до одреден степен“, рече тој.
Во однос на американските посредници, Путин го истакна задоволството од соработката со претставниците Стивен Виткоф и Џаред Кушнер, кои важат за блиски соработници на американскиот претседател Доналд Трамп.
„Виткоф и Кушнер се секогаш добредојдени во Русија и ние сме задоволни што соработуваме со нив“, додаде тој.
Рускиот претседател се осврна и на соработката меѓу разузнавачките служби, потврдувајќи дека контактите и директните разговори меѓу руските и американските специјални служби, вклучително и посетата на шефот на ЦИА на Москва, продолжуваат да се одвиваат.