Илјадници француски полицајци денеска протестираа во Париз поради лошите услови за работа и неисполнетите барања од надлежните институции.
Организатор на протестот беше синдикатот „Национална алијанса на полициски службеници“. Главниот револт на полицајците произлегува од фактот што од 2019 година не е зголемен додатокот за специјална полициска служба, односно таканаречениот „бонус на ризик“. Покрај тоа, тие бараат обезбедување повеќе средства за административниот, техничкиот и научниот персонал, подобри можности за напредување во кариерата, како и интензивно регрутирање нов кадар.
Според процените на синдикатот, за целосно исполнување на овие барања се потребни меѓу 300 и 500 милиони евра годишно.
Веднаш по завршувањето на протестот, претставниците на синдикатот остварија средба со претставници на Министерството за внатрешни работи. Од Националната алијанса на полициски службеници разговорите ги оценија како конструктивни.