Просечната месечна исплатена нето-плата по вработен во јуни годинава изнесувала 48.381 денар, што е за 6,4 проценти повеќе во споредба со истиот месец минатата година, соопшти Државниот завод за статистика.
Според објавените податоци, ваквиот раст на просечната плата главно се должи на зголемувањето на примањата во три сектори.
Најголем скок е забележан во секторот административни и помошни услужни дејности, каде што платите пораснале за 10,6 проценти.
Следуваат земјоделството, шумарството и рибарството со раст од 8,1 процент, како и секторот транспорт и складирање со зголемување од 8 проценти.
Од друга страна, статистиката евидентира пад на просечната месечна нето-плата во споредба со претходниот месец во неколку стопански гранки.
Најизразено намалување има кај трговијата на големо и мало и поправката на моторни возила за 9 проценти.
Пад на нето-платите е забележан и во уметноста, забавата и рекреацијата за 6,2 проценти, како и во снабдувањето со електрична енергија, гас, пареа и климатизација за 5,9 проценти.