Собраниската Комисија за финансирање и буџет денеска ќе ја продолжи амандманската расправа за Предлог-ребалансот на Буџетот, која влегува во третиот ден.
За ребалансот се поднесени вкупно 224 амандмани, од кои 90 од ДУИ, 78 од СДСМ, 51 од Левица и пет од коалицијата ВРЕДИ.
Со предложениот ребаланс, вкупните приходи се проектирани на 379,2 милијарди денари, што претставува зголемување од околу 4,2 милијарди денари, односно 1,1 процент во споредба со првично усвоениот Буџет за 2026 година. Вкупните расходи се планирани на 425,2 милијарди денари.
За капитални инвестиции се предвидени речиси 46 милијарди денари, што е за околу 5,8 милијарди денари или 14,5 проценти повеќе од првичниот план.
Макроекономските проекции остануваат со очекуван економски раст од 3,5 проценти, инфлација од 4,5 проценти и буџетски дефицит од 4,1 процент од бруто-домашниот производ.
Министерката за финансии Гордана Димитриеска-Кочоска истакна дека ребалансот не е последица на недостиг на приходи или нарушена ликвидност, туку има цел буџетските проекции да се усогласат со актуелните глобални економски услови.