Директорот на Агенцијата за остварување на правата на заедниците, Далибор Китановиќ, предизвика реакции во јавноста откако на својот профил на Инстаграм споделил објава посветена на поранешниот командант на Војската на Република Српска, Ратко Младиќ, кој на 27 август почина во притвор во Хаг додека издржуваше доживотна затворска казна.
Китановиќ објавил фотомонтажа, на која Младиќ е прикажан заедно со повеќе личности од српската историја, меѓу кои и четничкиот командант Дража Михајловиќ. На фотографијата стои пораката „Генерали на небеската војска“.
Реакциите се засилија и поради функцијата што ја извршува Китановиќ. Агенцијата на чие чело се наоѓа е задолжена за остварување и заштита на правата на заедниците и унапредување на меѓуетничката доверба.
Младиќ беше правосилно осуден на доживотен затвор за геноцид, злосторства против човештвото и воени злосторства за време на војната во Босна и Херцеговина. Меѓу делата за кои беше осуден е и геноцидот во Сребреница во 1995 година, каде беа убиени повеќе од 8.000 Бошњаци.
По објавата реагираа СДСМ и ДУИ. Од СДСМ побараа премиерот Христијан Мицкоски да се изјасни дали ваквиот однос кон Младиќ е став на Владата или индивидуален став на владин функционер, додека ДУИ побара разрешување на Китановиќ и политичка одговорност од партнерите во власта.
Реагираше и ВЛЕН, од каде што соопштија дека најостро осудуваат какво било глорифицирање на четничкото движење и величање на Ратко Младиќ. Без директно да го именуваат Китановиќ, од коалицијата порачаа дека е особено проблематично вакви содржини да споделува лице кое раководи со институција задолжена за правата на заедниците.
„Оној кој не ги почитува жртвите и вредностите на соживотот не може да биде гарант на правата на заедниците“, порачаа од ВЛЕН.
Полемики предизвикала и објава на Фејсбук-страницата на Демократската партија на Србите во Македонија, во која Младиќ е опишан како генерал кој животот го ставил во служба на својот народ, со порака дека „времето ќе суди“ и „историјата ќе се сети“.