Основниот кривичен суд Скопје му определи мерка притвор во траење од 30 дена на поранешниот претседател на Фудбалската федерација на Македонија, Муамед Сејдини. Судот ја донесе оваа одлука по предлог на надлежното обвинителство, поради основано сомневање дека Сејдини сторил кривично дело „проневера во служба“. Како причини за притворот, судот посочи опасност од бегство, како и можност за влијание врз сведоци и докази во постапката.
Сејдини, кој ја предводеше ФФМ во периодот од 2019 до 2025 година, беше уапсен вчера од припадници на Одделот за сузбивање на организиран и сериозен криминал и криминалистичката полиција.
Според обвинението, осомничениот во периодот ноември – декември 2024 година, злоупотребувајќи ја својата службена положба, прибавил противправна имотна корист од околу 660 илјади евра за правно лице од Скопје. Обвинителството детално го опиша начинот на извршување на делото:
„Сомненијата укажуваат дека делото е извршено така што ФФМ, како членка на УЕФА, во текот на 2024 година добила строго наменски парични средства за ревитализација на спортски терени и инфраскруктура. Со финансиската поддршка од УЕФА во рамките на програмата „HatTrick VI”, осомничениот започнал постапка за спроведување на проектот – изградба на трибина на Стадион “Билјанини Извори” во Охрид и дал предлог за отпочнување постапка за избор на компанија за реализација на проектот. По одобрување од Управниот одбор, осомничениот поднел барање до три фирми за понуди за изградба на трибината на стадионот. Била избрана најповолна понуда за изградба во вкупен износ од околу 3,3 милиони евра без ДДВ. Иако изведувачот тоа не го побарал, ниту во барањата за доставување понуди било наведено како можност, осомничениот, спротивно на одлуката на Управниот одбор, вметнал дополнителен услов во склучениот договор со избраната фирма, со кој предвидел авансна уплата во износ од 20% од вкупната вредност на договорот пред започнување на градежните работи и без какво било претходно постапување од изведувачот. Притоа не предвидел никакво правно обезбедување за уплатените средства на име аванс“, се вели во соопштението од Обвинителство.
На 17 декември 2024 година, Сејдини го потпишал договорот и со налог до службите извршил авансна исплата на 660 илјади евра кон правното лице, што е предмет на истрагата.