По повод 1 Јуни – Меѓународниот ден на детето, Првата детска амбасада во светот МЕЃАШИ денеска пред Собранието организира изведба на социјален танц-театар, подготвена од ученици од СУГС „Јосип Броз Тито“ од Скопје и СОУ „Гостивар“ од Гостивар.
Локацијата на настанот е избрана симболично – пред законодавниот дом, како место каде што се носат важни одлуки, со цел да се испрати порака дека заштитата на децата од насилство, како и нивната безбедност и благосостојба, мора да бидат врвен општествен и институционален приоритет.
Од МЕЃАШИ потсетуваат дека иако учебната година привршува, предизвиците со кои се соочуваат децата не завршуваат со последното училишно ѕвонче.
„Следува нова учебна година, нови генерации и деца кои ќе имаат потреба од безбедна, поддржувачка и ненасилна училишна средина“, наведуваат од организацијата.
Преку социјален танц-театар како форма на ангажирана уметност, учениците ќе прикажат дел од секојдневните искуства на насилство, отфрленост и осаменост со кои се соочуваат многу деца во училиштата, а кои често остануваат незабележани од возрасните.
Од МЕЃАШИ нагласуваат дека со овој настап младите испраќаат повик за поголема одговорност, емпатија и конкретни мерки за превенција и заштита на децата од сите облици на насилство и социјално исклучување.