Масивен пнеумоторакс и едем на мозокот се дел од причините за смртта на бебето од Арачиново, информираат од Државниот санитарен и здравствен инспекторат. Директорот на ДСЗИ, Кирил Лазов, потврди дека е покрената иницијатива за стручен надзор кој ќе го испитува целиот случај.
„До Министерството за здравство е доставена иницијатива за формирање стручна комисија која ќе утврди дали во третманот на новороденчето имало пропусти“, изјави Лазов.
Од извршениот вонреден надзор е утврдено дека по породувањето со царски рез, детето било ставено на антибиотска терапија и механичка вентилација. И покрај преземените мерки за реанимација по наглото влошување на состојбата, лекарите не успеале да го спасат новороденчето.
Случајот останува отворен до пристигнување на наодите од обдукцијата, кои треба точно да го лоцираат изворот на компликациите кои довеле до трагичниот исход.