Иран треба да биде подготвен и за повеќегодишен конфликт со Соединетите Американски Држави, порача иранскиот политичар Мохамед-Џавад Лариџани, брат на неодамна убиениот Али Лариџани, кој беше секретар на влијателниот ирански Совет за национална безбедност, пренесува ДПА.
„Она што ја држи настрана заканата од војна е нашата целосна подготвеност да се одбраниме“, рече денеска Лариџани во интервју за државната телевизија.
„Ако САД почувствуваат дека Иран е подготвен дури и за две или тригодишна војна, ќе сфатат дека (…) не треба да ја продолжат војната“, продолжи тој.
Лариџани истакна дека земјата треба да ја зајакне својата економска отпорност во случај на долготраен конфликт.
„Мора да се подготвиме за воена економија за да се зголеми отпорноста на населението“, повика политичарот.
Семејството Лариџани важи за едно од највлијателните во Иран. Пред војната, Али Лариџани беше една од клучните личности во иранската политичка структура, сè до неговото убиство во израелски воздушен напад.
Мохамед-Џавад Лариџани, кој важи за конзервативен политичар, веќе осум години е пратеник во иранскиот парламент, а неговата работа е главно насочена кон надворешната политика, наведува ДПА.