Пожарот во боровата шума над селото Ногаевци, кој синоќа беше ставен под контрола по повеќе од 10 часа интервенција, утрово повторно се разгоре поради силниот ветер.
Огнената стихија дополнително се прошири и во моментов го зафаќа и теренот од страната на селото Кочилари.
Од Територијалната противпожарна единица од Велес информираат дека попладнево околу 12:30 часот била побарана дополнителна помош на теренот поради брзото ширење на пламените јазици.
Во моментот во гаснењето се вклучени три екипи на ТППЕ Велес. Две екипи со две противпожарни возила интервенираат над селото Ногаевци, додека една екипа со едно возило дејствува од страната на селото Кочилари.
На терен во акцијата за справување со огнот помагаат и вработени од Шумското стопанство „Бабуна“.
Инаку, пожарот првично беше пријавен вчера попладне во 13:25 часот, по што велешките пожарникари излегоа со две возила и шест минувачи, а подоцна се приклучија уште две противпожарни возила и дополнителен екипаж.
Во вчерашната голема акција дејствуваше и Дирекцијата за заштита и спасување со два авиони „Ер Трактор“ и два огнени тимови со возила „пинцгауер“, со што огнот беше целосно изгаснат синоќа во 22:50 часот.
И покрај ноќните дежурства на екипите од Шумското стопанство „Бабуна“, силниот ветер утрово повторно ја активираше стихијата.
Засега нема опасност од пожарот по куќите, информираат од ТППЕ Велес.