Вкупно 18 пожари на отворен простор се регистрирани денеска на територијата на државата заклучно до 18:00 часот.
Според најновиот пресек на Центарот за управување со кризи (ЦУК), во моментот четири пожари се активни, два се под контрола, а 12 се целосно изгаснати.
Активни пожари има во Општина Новаци во селото Гнеотино на местото викано Ергела, каде што гори ниска вегетација, како и во Општина Долнени кај селата Ропотово и Бело Поле, каде што е опожарено стрниште.
Активен оган е забележан и во Општина Струмица, на излезот од селото Сачево кон селото Муртино, каде што горят стрниште и ниска вегетација, а се интервенира и во Општина Македонски Брод кај селото Слатина, на местото Слатински Мост, каде што е зафатена ниска вегетација и грмушки.
Под контрола се поставени пожарите во Општина Делчево на градската депонија, како и во Општина Македонски Брод, во селото Грешница на местото викано Стојанова Населба, каде што гори ниска вегетација, деградирана шума и грмушки.
Екипите на терен успеале целосно да изгаснат 12 пожари ширум државата.
Изгаснати се пожарите во Петровец (помеѓу Долно и Средно Коњаре), Карпош (Момин Поток), Бутел (село Љуботен) и Кичево (село Црвивци).
Исто така, целосно се ликвидирани и пожарите на три локации во Гостивар (Паталишта, Кејот на Вардар и меѓу Чајле и Форино), две локации во Могила, како и во Тетово (село Селце), Василево (село Доброшинци) и Прилеп кај Германските гробишта.