Со сведочење на д-р Александар Станков, вештак од Институтот за судска медицина, денеска продолжи судскиот процес за трагичниот пожар во кочанската дискотека „Пулс“. Вештакот изнесе шокантни детали за условите во објектот кои предизвикаа вознемиреност и солзи кај семејствата на жртвите во судницата.
Според неговите наоди, во моментот на пожарот температурата во внатрешноста била екстремно висока.
„Тоа е температура приближно за крематориум“, одговори Станков на прашање на обвинителката за амбиенталните услови во моментот на трагедијата.
Вештакот појасни дека доминантна причина за смртта кај најголем дел од настраданите е труењето со јаглероден моноксид, кој многу брзо го исполнува затворениот простор. Тој ги отфрли тезите дека други фактори биле пресудни.
„Јаглеродниот моноксид е најчест токсичен отров кој се јавува во запалени затворени простории. Тој многу брзо ја исполнува просторијата… Јаглеродниот моноксид е главниот причинител за задушување и труење. Во вакви случаи има вдишување на топол воздух, вдишување на чад и вдишување на цијанид. Тие само го потпомогнале задушувањето од јаглеродниот моноксид“, изјави Станков.
На прашањето дали брзата лекарска интервенција со кислород можела да спаси животи, Станков беше дециден дека при такви услови тоа не би помогнало.
„Примената на кислородот не би дала никакви резултати“, посочи тој.
Според обдукциските протоколи, најголем дел од лицата починале од насилна смрт како последица на труење. Кај четири лица смртта настапила од притисок врз градниот кош, додека кај три жртви причина била недостаток на кислород во околината.