Со денешното потпишување на договорот за инвестициски грант преку Инвестициската рамка за Западен Балкан (WBIF) на Европската Унија, како и договорите за финансирање со Европската инвестициска банка (ЕИБ) и Европската банка за обнова и развој (ЕБОР), започнува третата фаза од финансирањето на изградбата на железничката делница Крива Паланка – Деве Баир, дел од Коридорот 8.
Договорите беа потпишани во Владата, во присуство на премиерот Христијан Мицкоски, вицепремиерот и министер за транспорт Александар Николоски, министерката за финансии Гордана Димитриеска-Кочоска, претставници на Европската Унија, ЕБОР, ЕИБ и Железници – Инфраструктура.
За третата делница од железничкиот коридор 8 преку Инвестициската рамка за Западен Балкан на ЕУ се обезбедени 149 милиони евра грант средства.
Николоски оцени дека потпишувањето претставува важен чекор за реализација на проектот, кој, како што рече, е еден од приоритетите на Владата.
„Ова е исклучително значаен ден бидејќи по речиси две години работа доаѓаме до реален и остварлив проект. Успеавме да постигнеме договор со Бугарија за изградба на прекуграничен железнички тунел кој треба да ги поврзе двете држави“, изјави Николоски.
Тој додаде дека се очекува нов меѓувладин состанок со Бугарија, по кој двете држави заеднички ќе се обратат до ЕУ, ЕИБ и ЕБОР за обезбедување дополнителни средства за изградба на тунелот.
Министерката за финансии Димитриеска-Кочоска посочи дека со денешните договори се обезбедува финансиската конструкција потребна за непречена реализација на проектот.
„Изградбата на оваа железничка делница ќе овозможи подобра поврзаност меѓу Јадранското и Црното Море, поголема економска интеграција, полесно движење на луѓето и стоките и нови можности за развој на економијата“, рече таа.
Таа нагласи дека за стратешките инфраструктурни проекти е потребна стабилна финансиска рамка и додаде дека Владата обезбедила дополнителни средства за капитални инвестиции преку Ребалансот на Буџетот за 2026 година.
Коридорот 8 е еден од најзначајните инфраструктурни проекти за регионално поврзување, кој треба да овозможи железничка врска меѓу Јадранското и Црното Море и подобра интеграција на земјата во европските транспортни мрежи.