Земјава е под влијание на променливо и нестабилно време. Во изминатото деноноќие регистрирани се значителни количини на воден талог, додека температурите утрово се задржаа на ниско ниво.
Според мерењата на УХМР, најмногу дожд наврна во Маврови Анови – 48 литри на метар квадратен. Следуваат:
- Пожаране – 34 литри
- Крушево – 31 литар
- Прилеп – 23 литри
- Охрид – 21 литар
- Битола и Демир Капија – 17 литри
- Тетово – 16 литри
- Скопје – 5 литри
Утрово е забележано значително заладување. Најстудено е на Попова Шапка со -2 степени, додека во Маврови Анови се измерени 0 степени. Во останатите градови температурите се движат од 1 во Крушево, до 8 степени во Скопје.
Во текот на денот се очекува променливо облачно време со повремени врнежи од дожд, кои ќе бидат пообилни во западните и јужните делови. Поради продор на постуден воздух, на повисоките планини дождот ќе преминува во снег. Ќе дува слаб до умерен северен ветер, кој повремено ќе засилува долж Повардарието.
Максималните дневни температури ќе се движат во интервал од 10 до 15 степени. Во Скопје се очекува променливо облачно време со дожд и максимална температура до 15 степени.