Ратко Младиќ, кој почина по долг престој во притвор и затворска болница во Хаг, претходно зборуваше за тоа каде сака да биде погребан. Според неговиот син, Дарко Младиќ, неговата желба била да почива покрај неговата ќерка Ана.
Дарко Младиќ за оваа желба зборуваше додека неговиот татко беше во притвор на Хашкиот трибунал.
„Тој не сака да зборува со нас за тоа. Секогаш се обидува да биде позитивен. Но, кога Ана беше убиена, тој веднаш рече: „Ќе бидам покрај неа““, изјави тогаш Дарко Младиќ.
Ана Младиќ почина на 24 март 1994 година, на 23-годишна возраст. Смртта остави длабок траг врз семејството, а Дарко Младиќ претходно сведочеше дека тогаш Ратко Младиќ за првпат јасно кажал дека сака еден ден да биде погребан покрај неа.
Синот во повеќе наврати зборуваше за влошеното здравје на својот татко и за барањата на семејството да му биде дозволено лекување надвор од притворската единица во Шевенинген.
„Се случувало да се исклучи и да не го следи судењето поради последиците од мозочните удари. Тој пишувал одговори на хартија за својот адвокат со полупарализирана рака. Имал тешкотии со станувањето, имал проблеми со јадењето и се бричел со левата рака“, претходно изјави Дарко Младиќ.
Семејството и одбраната постојано бараа од Хашкиот трибунал да дозволи лекување во Србија, но тие барања беа одбивани. По смртта на Ратко Младиќ, неговиот син потврди дека неговото последно почивалиште ќе биде до неговата ќерка Ана.