Пазарот на недвижности во главниот град и натаму бележи нагорен тренд. Најновите податоци на Народната банка покажуваат дека во вториот квартал од 2026 година цените на становите во Скопје повторно се зголемиле.
Според официјалниот Индекс на цени на станови, во периодот од април до јуни е регистриран раст од 5,5 проценти во однос на претходниот квартал, што укажува дека побарувачката на пазарот останува висока.
Во споредба со истиот период минатата година, цените се повисоки за 13,3 проценти.
Иако станува збор за двоцифрен годишен раст, податоците покажуваат дека темпото на поскапување постепено се намалува. За споредба, во првиот квартал од годинава годишниот раст изнесуваше 16,6 проценти.
Од Народната банка појаснуваат дека индексот ја следи динамиката на цените исклучиво за становите во Скопје и се пресметува врз основа на цените наведени во огласите за продажба.
Тоа значи дека индексот не ги одразува конечните износи по кои недвижностите се купопродаваат, туку претставува индикатор за движењата на пазарот и очекувањата на продавачите.
Овој показател редовно се користи за следење на трендовите на пазарот на недвижности во главниот град.
Воедно, тој претставува и еден од клучните параметри што институциите ги анализираат при оценката на состојбите во домашната економија и финансискиот систем.