Македонија денеска се наоѓа под влијание на влажна и студена воздушна маса која ќе донесе облачно време со врнежи од дожд. Според метеоролозите, наместа врнежите ќе бидат пообилни, со наталожен воден талог од 15 до 20 литри на квадратен метар.
Поради продор на постуден воздух од север, на планините дождот ќе премине во снег. Дополнително, ќе дува умерен до засилен северен ветер, чија брзина на моменти ќе надминува 60 километри на час. Максималните температури ќе се движат од 10 до 18 степени Целзиусови.
Во Скопје времето ќе биде облачно со повремени врнежи од дожд и засилен северен ветер. Температурата во главниот град ќе се движи од минимални 9 до максимални 13 степени.
Според најавите од Управата за хидрометеоролошки работи (УХМР), нестабилното време ќе се задржи до крајот на неделата.
„Ќе дува умерен, до засилен ветер од северен правец. Температурата ќе биде во опаѓање, а утринската наместа ќе се спушти и под нула“, велат од УХМР.
Од понеделник се очекува стабилизација и постепен пораст на дневните температури.