Судењето на Дуејн „Кифи Ди“ Дејвис, обвинет за осмислување и организирање на убиството на раперот Тупак Шакур во 1996 година, почнува денеска во Лас Вегас.
Дејвис (63) е обвинет за убиство со смртоносно оружје со намера за поттикнување, напредување или помагање на криминална банда. Обвинителите не велат дека тој бил стрелецот, туку дека го организирал нападот како одмазда за тоа што Тупак и неговата придружба го претепале внукот на Дејвис во хотелот „Ем-џи-ем гранд“ неколку часа претходно. Истрелите биле испукани од бел „Кадилак“ во којшто Кифи Ди бил со уште тројца мажи, кои оттогаш починале. Дејвис се изјасни за невин.
Случајот е нерешен со децении, а обвинението е поднесено дури во 2023 година. Обвинетиот се соочува со доживотен затвор доколку биде осуден.
Значителен дел од доказите се однесуваат на претходните изјави на Дејвис. Во 2008 година, тој разговарал со истражителите кои ги истражуваа смртните случаи на Тупак и Ноториус Б.И.Г. т.е. Кристофер Волас, со договор дека сè што ќе каже за убиството на Тупак не може да се искористи против него. Сепак, речиси една деценија подоцна, тој објави книга „Легендата на улицата Комптон“ и даде неколку интервјуа за медиумите во коишто ја опишува својата улога во убиството на познатиот американски рапер.
– Доколку никогаш не одлучил да ја напише книгата, веројатно, Дејвис никогаш немаше да биде гонет за ова злосторство – изјави обвинителот Марк Диџакомо.
Адвокатот на Дејвис, Мајкл Санфт, тврди дека книгата е напишана за профит, а не за вистината, и оспорува делови коишто, тврди, воопшто не биле напишани од обвинетиот.
Членовите на семејството на Тупак се очекуваат во судницата. Неговиот полубрат, Морис „Мопрем“ Тупак, рече дека судењето ќе биде оживување на траумата за семејството, но дека е важно да се присуствува. Судењето би можело да трае со недели, при што обвинителството планира да повика меѓу 35 и 45 сведоци, додека одбраната ќе претстави само неколкумина.