По три дена деноноќни интервенции, пожарот во кавадаречкото село Раец е целосно изгаснат, информираше градоначалникот на Кавадарци, Митко Јанчев.
Тој на социјалните мрежи објави фотографии од тимот пожарникари и доброволци кои изминатиот период учествуваа во справувањето со огнената стихија.
„Во овие исклучително тешки моменти уште еднаш се потврди силата на солидарноста и несебичната посветеност на сите служби и поединци што деноноќно беа на терен во борбата со огнената стихија“, напиша тој на Фејсбук.
Јанчев упати јавна благодарност до сите кои беа вклучени во акцијата за справување со огнот.
Меѓу нив ги посочи Противпожарните единици на Кавадарци и Неготино, ЈП „Комуналец“ Кавадарци, Дирекцијата за заштита и спасување (ДЗС), Центарот за управување со кризи (ЦУК) и Општата болница во Кавадарци.
Благодарност беше упатена и до Шумското стопанство „Бор“, Министерството за внатрешни работи, Армијата, ОВР Кавадарци, Граничната полиција-Југ, како и до доброволните противпожарни друштва.
Градоначалникот им се заблагодари и на сите доброволци и жители на селата Раец и Дреново, кои на различни начини помогнаа во локализирањето и гаснењето на пожарот.
„Вашата храброст, пожртвуваност и несебична поддршка беа од непроценливо значење за успешно надминување на оваа сериозна состојба“, посочи тој.