Албанската јавност е во шок по тешката сообраќајна несреќа што се случи во пристанишниот град Драч. Возач под дејство на алкохол удрил во група деца додека си играле на тротоар, при што две деца на возраст од 10 и 13 години починале на лице место.
Трето дете, на 8-годишна возраст, со тешки повреди е префрлено на клиниката за трауматологија во Тирана и се бори за живот, додека четвртото дете поминало без повреди.
Возачот Никол Радачи (57) веднаш по ударот го напуштил местото на настанот, но набрзо бил приведен од страна на полицијата.
„Убијте ме, не заслужувам да живеам, ги зедов на душа децата“, рекол возачот во моментот на апсењето.
Локалните медиуми пренесуваат сведоштва на соседите кои велат дека децата биле во блиско сродство. Трагедијата е уште поголема бидејќи родителите на едно од децата во моментот се наоѓале во Италија на лекување. Соседите тврдат дека возачот и претходно бил познат по проблематично однесување и често возел под дејство на алкохол.
По настанот реагираше и државниот врв. Премиерот Еди Рама упати апел до медиумите за одговорно известување без објавување вознемирувачки кадри.
„Должност на сите, но особено на медиумите, е да покажат воздржаност, чувствителност и одговорност. Објавувањето на морничави слики не е информирање, туку само ја зголемува болката на погодените семејства“, напиша Рама.