Хрватската музичка ѕвезда Северина Вучковиќ јавно им даде поддршка на граѓаните на Сараево, кои веќе петти ден масовно протестираат по трагичната сообраќајна несреќа што се случи на 12 февруари. Пејачката на својот Инстаграм профил сподели емотивни видеа и фотографии од масовните собири, со пораки во кои истакнува дека „Сараево се буди“ и изразува длабоко сочувство до семејствата на настраданите. Таа сподели и спомени од својот последен голем настап во овој град, порачувајќи дека секогаш ќе стои со сараевската публика.
Протестите, кои се во полн ек, се предводени од средношколци и студенти кои бараат одговорност и поголема безбедност во сообраќајот по смртта на 23-годишниот Ердоан Моранкиќ и тешкото повредување на 17-годишната Ела Јовановиќ. Демонстрантите се собрани пред Земаљскиот музеј на БиХ, на самото место на несреќата, по што колоната се упати кон центарот на градот. Поради масовноста на протестот, сообраќајот во овој дел од Сараево е целосно блокиран, а организаторите апелираат на мирно изразување на револтот со цел да се зачува достоинството на собирот.