Пратеникот на ВМРО-ДПМНЕ, Бране Петрушевски, денеска упати сериозни обвинувања до СДСМ и поранешниот министер Оливер Спасовски, тврдејќи дека лица вклучени во нивната кампања организираат протести против проектот „Безбеден град“. Според Петрушевски, овие лица јавно повикувале на насилство и линч врз полициски службеници.
Петрушевски посочи дека протестите се насочени против мерките кои треба да спречат возење без возачка дозвола и нерегистрирани возила. Тој потсети дека СДСМ и Спасовски во Собранието гласаа против овој проект.
„Јавно ги прашуваме СДС и Оливер Спасовски, дали ќе се дистанцираат од овие протести и од лицата кои повикуваа на јавен линч? Дали сметаат дека е прифатливо да се протестира против сообраќаен ред и безбедност?“, праша Петрушевски.
Од ВМРО-ДПМНЕ повикаа надлежните институции да постапат без селекција и да обезбедат одговорност за сите кои испраќаат закани за насилство и убиство, нагласувајќи дека целта на „Безбеден град“ е единствено зголемување на безбедноста на граѓаните.