Пратеникот од редовите на ВМРО-ДПМНЕ, Бране Петрушевски, денеска одржа прес-конференција на која упати остри критики кон лидерот на СДС, Венко Филипче, обвинувајќи го дека неговата политика е директно насочена против националните интереси. Според Петрушевски, опозицијата е спремна на сè, вклучително и на распродажба на јазикот, културата и идентитетот, само за да се врати на власт.
„Лековерноста и лојалноста на Филипче и СДС кон бугарските политичари од ден на ден се зголемува, што директно наштетува на македонските позиции и црвени линии“, истакна Петрушевски.
Тој тврди дека за раководството на СДС не претставува проблем македонскиот јазик да биде претставен како бугарски дијалект, ниту пак историските личности како Гоце Делчев, Питу Гули и Јане Сандански да бидат присвоени од бугарската страна. Според Петрушевски, единствената цел на СДС е да им служи на странските интереси и да ги убедува граѓаните дека уставните измени се единствениот пат кон ЕУ.
На крајот, пратеникот на ВМРО-ДПМНЕ нагласи дека актуелната власт води „достоинствена државна политика“ која се базира на дела, резултати и реформи, ставајќи, како што рече, крај на долгогодишните лаги на СДС.