Петровска: Законот за попис гарантира спроведување попис по сите меѓународни стандарди

Законот за попис на населението што го усвоивме овде во Собранието гарантира спроведување попис по сите меѓународни праски и стандарди, истакна денеска на прес-конференција во Собранието пратеничката од СДСМ, Славјанка Петровска.

Вели дека речиси 20 години државата е без целосни, прецизни и релевантни податоци за населението, домаќинствата, становите, без податоци што се потребни за градење на политики и стратегии.

-Време е тоа да го исправиме. Државниот завод за статистика, стручните лица во оваа институција имаат капацитет и подготвеност да спроведат успешен попис. Успешно реализираниот попис ќе донесе прецизни, целосни податоци за демографската, социјалната, образовната, верска и национална структура на населението. Со успешно реализиран попис точно ќе ги мапираме потребите на регионите и единиците на локалната самоуправа кои ќе добијат податливи информации важни за локалниот и регионалниот развој. За да се спроведе оваа обемна статистичка операција потребна е ангажираност од секој поединец, од секоја политичка партија. Затоа, апелираме до сите на одговорно однесување, да дадеме придонес во реализација на оваа операција важна за развојот на државата, по 19 години да имаме успешен попис кој ќе ни даде релевантни податоци но и насоки за тоа каде треба да се движиме во економијата, образованието, социјалната политика, детската заштита, рече Петровска.