Пратеничката на ВМРО-ДПМНЕ, Лидија Петкоска, на денешната прес-конференција соопшти дека преку македонските аеродроми во Скопје и Охрид во изминатиот период се воведени 28 нови авиодестинации.
Според неа, проширувањето на мрежата на летови има за цел подобрување на воздушната поврзаност на државата со европските и светските метрополи.
„Воздушната поврзаност е важна за секоја модерна и развиена држава. Таа значи полесно патување за граѓаните, повеќе можности за туризмот и бизнисот и поголема отвореност на Македонија кон Европа и светот“, изјави Петкоска.
Од аеродромот во Скопје, како што посочи таа, овозможени се директни летови до Париз, Барселона, Лион, Амстердам, Љубљана, Дубаи, Мадрид, Стокхолм, Келн, Бари, Прага, Ларнака, Неапол, Будимпешта, Алгеро во Сардинија и Палермо во Сицилија.
Истовремено, од аеродромот во Охрид воведени се линии до Истанбул, Базел, Ларнака, Мадрид, Штутгарт, Бари, Стокхолм, Катовице, Вроцлав, Милано, Братислава и Виена.
Петкоска истакна дека новите директни линии ги олеснуваат патувањата за работа, образование и за посета на семејствата во странство, а истовремено го поттикнуваат странскиот туризам и прилив на инвестиции.
„Владата предводена од ВМРО-ДПМНЕ ќе продолжи посветено да работи на проширување на мрежата на дестинации и создавање услови за нови авиолинии од Скопје и Охрид, затоа што Македонија треба да биде држава со повеќе можности, подобра поврзаност и отворени врати кон светот“, порача пратеничката.