Пратеничката Лидија Петкоска од ВМРО-ДПМНЕ објави статус на социјалните мрежи на кој потенцира дека проблемот не е во зборот, туку во огледалото и додаде „да не се лутат на зборот „талог“, да се лутат поради причината во која се препознаваат во него, јасно ни е од каде доаѓа нервозата“.
По продолжение е интегрален текст од објавата:
„Проблемот не е во зборот, туку во огледалото!
Една изјава беше доволна за целата опозиција да скокне како попарена.
Но, зошто?
Ако тврдат дека тие не се талогот на општеството, зошто толкава паника и драматизација?
Навистина е фасцинантно колку брзо се препознаа.
Никој не ги прозва по име, а сите се построија во ред за демант.
Богами…ваква самодоверба ретко се гледа.
Истите политички пиромани кои седум години ја палеа државата со неспособност, денес глумат пожарникари!
Истите мајстори за празни ветувања, кои не изградија ниту еден километар нов автопат, денес држат лекции за инфраструктура!
Делницата Кичево – Охрид со години беше симбол на застој и повеќе личеше на ботаничка градина, отколку на градилиште!
Додека тие се богатеа, народот осиромашуваше.
Додека тие се фалеа со монтирани и скапо платени видеа, Македонија тонеше на дното по економски раст.
Инфлацијата дивееше, платите и пензиите каскаа зад цените, а единственото што растеше со брзина на светлината, беа нивните изговори.
Затоа денес ни е и повеќе од јасно од каде доаѓа нервозата!
Денес граѓаните сè појасно ја препознаваат разликата меѓу
политика на резултати и политиката на изговори.
И сега, кога бројките се подобруваат, кога се градат патишта, кога економските показатели се движат во добра насока, кога Македонија конечно излегува од местото во кое тие ја заковаа, ги вознемируваат резултатите!?
Ако си го поставиме прашањето зошто секој успех ги прави толку нервозни? Одговорот е едноставен.
Успехот најсилно ги демантира оние кои цела политичка кариера ја граделе врз магла, прашина и манипулации.
Затоа…не лутете се на зборот – лутете се на причината поради која се препознавате во него“.