Европа и Балканот се подготвуваат за нов моќен топлотен бран кој носејќи врел воздух од Сахара се заканува да собори метеоролошки рекорди. Метеоролошкиот сервис „Severe Weather Europe“ (SWE) соопшти дека четвртиот топлотен бран сезонава ќе донесе екстремно високи температури поради специфичниот атмосферски феномен познат како „Омега блок“.
Овој систем овозможува формирање на т.н. топлотна купола над centralna и западна Европа, како и Медитеранот. Топлинската купола функционира како капак, при што заробeниот топол воздух се спушта кон земјата, се компресира и дополнително се загрева, а отсуството на ветар и облаци го засилува ефектот на затоплување.
Според SWE, топлотниот бран најпрво ги погодува Шпанија и Франција со температури од 42 до 46 степени, по што центарот се поместува кон југоисток. На директен удар се Србија, Хрватска, Босна и Херцеговина, Унгарија и Романија, каде што се очекуваат температури над 40 степени Целзиусови.
Покрај високите дневни температури, метеоролозите предупредуваат и на тропски ноќи во кои минималните температури нема да паѓаат под 24 степени, што го спречува организмот соодветно да се одмори. Сушата и ниската влажност на воздухот дополнително создаваат висок ризик од појава на шумски пожари.
Републичкиот хидрометеоролошки институт на Србија (RHMZ) веќе активираше црвен метеоаларм. Според нивните податоци, температурите од среда (31–35°C) и четврток (33–36°C) рапидно ќе растат.
За петок и сабота се најавуваат критични вредности од 35 до 38 степени, а локално живата во термометарот ќе достигне и до 40 степени. Метеоролозите најавуваат дека олеснување нема да има ниту од недела до следниот четврток, кога ќе се задржи екстремно топлото време.