Автентичен дел од оригиналните спирални скали на Ајфеловата кула е продаден на аукција во Париз за неверојатни 523.800 евра, што е дури десет пати повеќе од првично проценетата вредност.
Станува збор за парче историја со висина од 4,3 метри, составено од 25 скалила и тешко околу 900 килограми. Овој сегмент некогаш ги поврзувал вториот и третиот кат на најпознатиот париски споменик.
Интересот за ова парче метал бил огромен, а наддавањето било исклучително напнато, соопштија од аукциската куќа „Аркуриал“ (Artcurial).
Како скалите на Густав Ајфел завршија на аукција?
Оригиналните спирални скали, кои биле поставени уште при изградбата на кулата во 1889 година од страна на инженерот Густав Ајфел, биле отстранети во 1983 година. Причината за тоа била модернизација на објектот и поставување на лифт меѓу највисоките катови од безбедносни причини.
Тогаш, скалите биле исечени на 24 дела со различна големина:
- Речиси сите делови биле распродадени на јавни аукции.
- Три дела биле донирани на престижни француски музеи (Музејот Орсе, Музејот на науката и технологијата во Париз и Музејот на историјата во Париз).
- Останатите парчиња денес се наоѓаат во приватни колекции низ целиот свет, вклучувајќи ги градините на „Јомиуриланд“ во Токио, во близина на Статуата на слободата во Њујорк, па дури и во Дизниленд на Флорида.
Парчето што беше предмет на последната аукција потекнува од една приватна канадска колекција, а новиот сопственик, кој ја понудил вртоглавата сума, е купувач од Азија чиј идентитет останува анонимен.