Папата Лав Четиринаесети денеска ги осуди „неприфатливите“ услови со кои се соочуваат Палестинците во Газа, изразувајќи солидарност со цивилите и обновувајќи го повикот за прекин на огнот во војната меѓу Израел и Хамас.
„Ја изразувам мојата длабока блискост со палестинскиот народ во Газа, кој продолжува да живее во страв и да преживува во неприфатливи услови, повторно принуден да ја напушти својата земја“, рече папата Лав XIV во својата редовна општа аудиенција во Ватикан.
Израел вчераутро започна голем копнен напад врз градот Газа, принудувајќи стотици илјади луѓе да ги напуштат своите домови поради тоа што го нарекоа најтешко бомбардирање во двете години од војната.
Папата го обнови својот повик за прекин на огнот, ослободување на заложниците во Газа и преговарачко дипломатско решение на конфликтот.
Тој ги повика верниците да му се придружат во молитва „за наскоро да осамне зората на мирот и правдата“.
Папата Лав, во последните неколку недели ги засили своите повици за прекин на војната во Газа.
Порано овој месец, тој се сретна со израелскиот претседател Исак Херцог во Ватикан. Во невообичаено долгата изјава по состанокот, Ватикан соопшти дека Лав му изразил жалење на Херцог за „трагичната ситуација во Газа“.
Израелската војска денеска објави дека откако започнала голема копнена офанзива за уништување на Хамас, нападнала повеќе од 150 цели низ целиот град Газа.
„Во изминатите два дена, воздушните и артилериските сили нападнаа повеќе од 150 терористички цели низ целиот град Газа со цел да ги поддржат единиците што маневрираат во областа“, објави израелската армија.
Израел ја започна копнената офанзива врз градот Газа само неколку часа откако американскиот државен секретар Марко Рубио се сретна со израелскиот премиер Бенјамин Нетанјаху во Ерусалим, велејќи му дека Вашингтон го поддржува Израел.