Директорот на Управата за извршување на санкциите, Александар Пандов, денеска оствари работен состанок со делегација на Европскиот комитет за превенција од тортура и нечовечко или понижувачко постапување или казнување (CPT).
Делегацијата беше предводена од претседателот на CPT, Алан Мичел, а во неа учествуваа и членовите Слава Новак, Хелена Папа и Ризван Раду, како и секретарот Кристијан Лода.
Како што информираат од Управата за извршување на санкциите, на состанокот се разговарало за напредокот во реформите и активностите преземени во пенитенцијарниот систем во изминатиот период.
Фокусот бил ставен на мерките што ги спроведуваат Управата за извршување на санкциите, казнено-поправните установи (КПУ) и воспитно-поправните установи (ВПУ), со цел подобрување на условите за осудените и притворените лица.
На состанокот се разговарало и за активностите поврзани со функционирањето и унапредувањето на пробацијата.
Од Управата наведуваат дека средбата била во насока на согледување на постигнатиот напредок и понатамошно унапредување на состојбите во пенитенцијарниот систем.