Силно невреме со пороен дожд, грмежи, силен ветер и град предизвика пожари, материјални штети и прекини во електроснабдувањето во Куманово, Старо Нагоричане и Липково.
Кумановската противпожарна единица вчера интервенирала во селата Челопек и Руѓинце, каде гаснела опожарена куќа и пожар на житни површини. Пожарникарите дополнително отстраниле паднато дрво врз возило на булеварот „Октомвриска револуција“, а интервенирале и на пожар на улицата „Индустриска“.
Голема интервенција имала и Територијалната противпожарна единица од Старо Нагоричане, која од 13:37 часот со три противпожарни возила и 12 пожарникари гаснела пожар на сува трева и нискостеблеста шума во атарот на селата Степанце и Добрача.
Во гаснењето се вклучиле и екипи од Шумското стопанство Куманово, припадници на полицијата, пожарникари од Ранковце, како и два авиона за гаснење. Пожарот бил ставен под контрола по врнежите од дожд.
Во Старо Нагоричане, поради спојување на електрични жици предизвикано од силниот ветер, биле регистрирани пожари и во селата Канарево, Пузајка, Руѓинце, Жегљане и Челопек.
Од Регионалниот центар за управување со кризи (РЦУК) Куманово информираат дека околу 17:30 часот регионот бил погоден од силно невреме, по што на бројот 112 биле примени повеќе пријави за прекини на електрична енергија, паднати дрвја и бандери, искрење и скинати електрични кабли, како и паднат лимен покрив од зграда на улицата „Лесковачка“.
Невремето со силен ветер и дожд ја зафатило и Општина Липково, каде исто така биле пријавени прекини во снабдувањето со електрична енергија.