Основниот суд во Улцињ изрече казна затвор од 45 дена за Сашка Стојановска (43) од Скопје, која е прогласена за виновна за кривичното дело „убивање и мачење животни и разорување на нивното живеалиште“.
Според пресудата, на 24 јули околу 15 часот, на булеварот „Теута“ во населбата Улцињско Поле, во близина на хотелот „Хоти“, обвинетата управувајќи автомобил „мерцедес“ најмалку двапати со возилото поминала преку куче од расата шарпланинец, сопственост на оштетениот. Кучето се здобило со тешки повреди од кои подоцна угинало.
При одмерувањето на казната, судот ги ценел сите релевантни околности. Како олеснителни биле земени предвид семејните прилики на обвинетата, фактот дека е мајка на две деца, од кои едното е малолетно, нејзината претходна неосудуваност, како и битно намалената пресметливост во моментот на извршувањето на делото, утврдена врз основа на наод и мислење од психијатар. Отежнителни околности не биле утврдени.
Судот оценил дека казната е соодветна и со неа ќе се постигне целта на казнувањето, со цел спречување идно противправно однесување и испраќање јасна општествена осуда за ваквите дела. Во изречената казна на Стојановска ќе ѝ се пресмета и времето поминато во притвор од 24 јули 2026 година.