Во пресрет на претстојната туристичка сезона и очекуваниот зголемен сообраќаен метеж, започна инсталирањето на системот „Безбеден град“ (Safe City) во најголемите туристички центри во земјава. Во Охрид и Струга во моментов се поставуваат вкупно 40 сообраќајни камери, а ваков видеонадзор веќе е инсталиран и на патниот правец Охрид-Кичево.
Како што информираат надлежните, камерите се поставуваат на повеќе стратешки локации. Во фокусот се кружните текови на влезовите во Охрид и централното градско подрачје. Дополнително, дел од опремата претходно беше инсталирана на критичните точки на патот кон Кичево, поточно кај селата Горенци, Требеништа, Ботун и Ново Село во Општина Дебрца.
Проектот засега е во фаза на техничко тестирање, што значи дека прекршоците снимени од овие камери сè уште не се санкционираат.
Портпаролот на СВР Охрид, Стефан Димоски, појаснува дека до целосното активирање на новиот систем, сообраќајната полиција нема да толерира прекршоци и продолжува со засилени контроли користејќи мобилни електронски камери, со крајна цел поголема безбедност и намалување на бројот на сообраќајни незгоди.
Од полицијата најавуваат целосна транспарентност пред официјалниот старт на системот. Јавноста навремено ќе биде информирана за точните локации на камерите, за видовите прекршоци што ќе подлежат на санкции, како и за строгите мерки за заштита на личните податоци на граѓаните. Главната цел на „Сејф сити“ е да се сузбијат брзото возење, опасното претекнување и непрописното паркирање за време на туристичкиот шпиц.