Главната расправа за трагичниот пожар во дискотеката „Пулс“ во Кочани, која требаше да се одржи утре, е одложена. Причина за одложувањето е изборот на адвокатката Сузана Јошевска-Анастасовска за членка на Судскиот совет, соопштија од Основниот кривичен суд Скопје.
Јошевска-Анастасовска е бранителка на обвинетиот Аднан Џаферовски, поранешен директор на Дирекцијата за заштита и спасување (ДЗС). Поради нејзината нова функција, на Џаферовски му е потребно време за ангажирање нов адвокат и негово запознавање со обемниот предмет.
Процесот за трагедијата во која животот го загубија 63 лица, а над 200 беа повредени, се наоѓа во доказна постапка. Сите 35 обвинети досега се изјаснија за невини, иако обвинителството тврди дека дискотеката била „смртоносна стапица“ поради институционални пропусти и незаконско работење повеќе од една деценија. Следното рочиште е закажано за 26 јануари.