Цените на нафтата денеска забележаа значителен пад на светските пазари, откако вестите за прекин на огнот меѓу Иран и Израел внесоа поголем оптимизам кај инвеститорите. Дополнителен поттик за намалувањето на цените дадоа и сигналите од Вашингтон дека сообраќајот низ клучните поморски рути се нормализира.
Падот на вредноста на енергенсите попладнево ги донесе следните бројки:
- Нафта Брент (Лондон): Поевтини за 4 долари и се тргуваше по цена од 90,20 долари за барел.
- Сурова нафта (САД): Падна за 4,54 долари и достигна цена од 86,76 долари за барел.
Позитивното расположение на берзите уследи по брзата дипломатска реакција на Белата куќа. Американскиот претседател Доналд Трамп јавно ги повика двете страни веднаш да ја запрат размената на напади, по што Тел Авив и Техеран привремено ги суспендираа воените дејствија.
Инвеститорите дополнително се охрабрени од расчистувањето на Ормускиот Теснец, каде податоците на „Kpler“ покажаа дека уште еден катарски танкер со течен гас успешно ја поминал рутата, со што бројката се искачи на вкупно девет од почетокот на кризата.
Американскиот министер за енергетика, Крис Рајт, потврди дека извозот на нафта преку Персискиот Залив продолжува да расте:
„Би рекол дека сообраќајот е значително засилен. Извозот на нафта низ теснецот и Персискиот Залив расте и ќе продолжи да расте“, изјави Рајт.
Сепак, пазарите остануваат претпазливи. Најновите пресметки на ОПЕК покажаа поинакво движење кај нивната референтна кошничка, каде цената на барелот се зголеми за 1,89 долари и достигна 102,52 долари, што е доказ дека глобалните пазари сè уште реагираат на геополитичките потреси.