Министерот за земјоделство, Цветан Трипуновски, и директорот на Тутунскиот комбинат Прилеп, Александар Алексовски, денеска го најавија почетокот на откупот на тутун од реколтата 2025 година.
Според министерот, процедурите налагаат денеска да се подигнат мострите, што значи дека откупот може да започне од утре.
„Знаете се наоѓаме на почетокот на откупната сезона на тутун од реколта 2025 година, согласно процедурите, мострите во текот на денешниот ден ќе бидат подигнати, што значи дека од утре ќе може да се почне со откуп на тутун”, истакна Трипуновски од Прилеп.
Директорот на Тутунскиот комбинат потврди дека на сите пријавени пунктови откупот ќе започне утре и ќе трае во рамки на законските рокови.
Трипуновски посочи дека оваа година тутунот е со одличен квалитет.
„Минатата година знаете дека постигнавме сериозен успех, имаме околу 11% зголемени површини од пријавени земјоделски стопанства во делот на одгледувачи на тутун. Тоа значи дека веќе го враќаме овој стратешки производ на пиедесталот”, појасни министерот.
Тој додаде дека министерството, преку Државниот инспекторат за земјоделство, ќе го следи целиот процес на откупување и изрази надеж за поуспешна сезона од ланската.