Ново поскапување на дизелот, а значително помала корекција кај бензините е најреалното сценарио за денешната одлука на Регулаторната комисија за енергетика. Иако суровата нафта утрово повторно поевтинува и Брентот се спушти до околу 102 долари за барел, за денешната пресметка поважни се високите цени на рафинираните горива во текот на минатата недела.
Просечната медитеранска котација на рафинираниот дизел во периодот од понеделник до петок била околу 1.595 долари за тон, наспроти околу 1.494 долари претходната недела. Тоа е раст од речиси 7 проценти, а дополнителен притисок создава и доларот, кој во просек зајакнал за околу еден процент во однос на денарот.
Кај бензинот растот на берзанската цена е многу помал – околу еден процент, па заедно со курсот на доларот притисокот врз домашната цена е околу два проценти. Оттука, најреално е ЕУРОСУПЕР БС-95 и БС-98 да поскапат за околу денар за литар.
Најголемата промена повторно се очекува кај дизелот. Доколку официјалните Platts котации на РКЕ се движат слично со јавно достапните берзански показатели, дизелот би можел да поскапи за неколку денари.
Ценовниот удар и овојпат ќе биде ублажен со владините мерки. ДДВ-то за дизелот е намалено на 10 проценти до 28 септември, а во последната пресметка акцизата беше намалена за четири денари кај дизелот и за два денари кај бензините.
Падот на суровата нафта што се случува денеска е добра вест, но најверојатно ќе има поголемо влијание врз следната неделна пресметка. Конечните максимални цени РКЕ треба да ги соопшти денеска околу пладне.