Јавното обвинителство ги оцени како целосно неприфатливи предлозите на одбраната за сослушување на сопственикот на дискотеката „Пулс“, Дејан Јованов, и неговиот син Михајло Јованов, во судскиот процес против деветмината полициски службеници обвинети за пропусти при проверките и издавањето согласности за угостителскиот објект.
Јавната обвинителка Спасенка Андонова на денешното рочиште во Основниот кривичен суд Скопје посочи дека предложените сведоци немаат никаква допирна точка со суштината на обвинението.
– За обвинителството ваквите предлози апсолутно беа неприфатливи, прво немаат допирна точка со она што е предмет на обвинение, ниту пак околностите коишто одбраната ги наведе како причина зошто се истите предложени како сведоци, за обвинителството не беа прифатливи – изјави јавната обвинителка Спасенка Андонова по денешното рочиште.
Во однос на тврдењата на одбраната дека со овие сведочења ќе се докаже оти Дејан Јованов не добивал плата неколку месеци, обвинителката појасни дека фокусот на обвинението е многу поширок.
– Фокусот на обвинението не е само добивањето на плата на Дејан Јованов, туку цела низа на дејствија коишто биле преземени, односно недоволно преземени дејствија од страна на полициските службеници коишто довеле до непречено функционирање на правниот субјект, односно во тој временски период остварување на финансиски промет – изјави Андонова.
Обвинителството се произнесе и за останатите предлог-докази: се согласи за сослушување на дел од предложените сведоци доколку нема писмен доказ, но одби предлози за економско-правно вештачење и технички наоди. Одбраната, пак, реагираше дека доказите се обезбедуваат селективно и побара отфрлање на сите наводи.
Судскиот процес за деветмината полицајци обвинети за „злоупотреба на службената положба и овластување“, кои претходно изјавија дека не се чувствуваат виновни, продолжува на 5 ноември.