Исказот на Стојанче Јовановски, во кој тој тврдеше дека е жртва на завера и подметнувања, за обвинителството е само очекуван обид за избегнување на казната. Обвинителката Адела Бојчевиќ денеска изјави дека материјалните докази и вештачењата цртаат сосема поинаква слика за обвинетиот од онаа што тој се обиде да ја претстави пред Судот.
Бојчевиќ се повика на психолошкото вештачење, кое кај Јовановски детектирало изразена манипулативност и тенденција кон искривување на вистината.
„Ова не е моја субјективна проценка. Вештачењата укажуваат на личносни карактеристики кај обвинетиот како изразена манипулативност и префрлање на одговорноста на други лица. Целиот исказ е само обид тој да се прикаже како жртва, а не како сторител“, децидна е Бојчевиќ.
Обвинителката најави дека сите докази кои ја потврдуваат неговата вина за семејно насилство и помагање во самоубиство ќе бидат детално елаборирани во завршниот збор.