Основното јавно обвинителство Кавадарци поднесе обвинителен акт против едно лице од Неготино за тешки дела против општата сигурност, односно за кривично дело по член 292 став 2 во врска со член 288 став 2 од Кривичниот законик. Дополнително, за предизвикување општа опасност од член 288 став 5 во врска со став 2, обвинението се однесува и на правното лице, чиј сопственик и управител е обвинетиот.
Обвинителството ја спроведе истрагата за настан од 21 јули 2021 година, кога обвинетиот управител и правното лице, при изведување работи на сепарација на реката Вардар, не постапувале според прописите и мерките за заштита при работа, со што ги прекршиле Законот за работни односи и Законот за безбедност и здравје при работа. Како последица на тоа, еден работник го загубил животот, а друг се здобил со телесни повреди.
Според обвинението, управителот го ангажирал сега починатиот Петар Мицев без склучен договор за вработување и без да провери дали ги исполнува условите за работа. Тој му овозможил да управува тешко моторно возило – камион на сепарацијата, без да провери дали има соодветна возачка дозвола за тој тип возило.
На критичниот ден, 21 јули 2021 година, оштетениот со камионот во сопственост на правното лице превезувал песок од реката Вардар до сепарацијата кај местото „Пумпите“, додека со него како совозач бил и другиот оштетен работник. Движејќи се по импровизирана патека – тесен насип од чакал, меѓу двата крака на реката, камионот се превртел и паднал во Вардар. Совозачот успеал да излезе преку прозорецот и да исплива на брегот, здобивајќи се со телесни повреди, додека возачот останал заробен под возилото и починал на лице место.
Во текот на истрагата, обвинителството обезбедило докази и против еден вработен во АД „Водостопанство на РСМ“ – Подружница Тиквеш-Кавадарци, кој во својство на службено лице и оператор на главни испусти/затворачи заверил повеќе испратници со невистинита содржина.
Поради тоа, и тој е обвинет за продолжено кривично дело – фалсификување службена исправа, согласно член 361 став 1 од Кривичниот законик.