Новиот лидер на Хамас, Халил ал-Хаја, денеска го одржа своето прво телевизиско обраќање откако во понеделникот беше избран на функцијата. Тој ги претстави шесте главни приоритети на движењето, при што како најважна цел го посочи целосниот крај на израелската воена офанзива во Газа и повлекувањето на израелските сили од енклавата.
Ал-Хаја ги повика државите-посредници во преговорите за прекин на огнот да извршат притисок врз израелската влада за спроведување на постојните договори и преминување кон следната фаза од процесот. Тој го посочи ова како прв и главен приоритет на Хамас.
Како втор приоритет го наведе враќањето на достоинствени услови за живот за Палестинците во Газа. Според него, тоа подразбира спречување на плановите за раселување, забрзување на обновата на енклавата и обезбедување ослободување на затворениците.
Третиот приоритет, според Ал-Хаја, е постигнување палестинско единство преку непосреден национален дијалог. Целта, како што рече, е обнова на палестинските институции, особено на Организацијата за ослободување на Палестина, врз демократски основи и со општ консензус.
Четвртиот приоритет е зајакнување на односите со арапските и муслиманските земји, додека петтиот се однесува на нивна мобилизација за поконкретни чекори и зголемен притисок за запирање на, како што го нарече Ал-Хаја, „машината за убивање и геноцид“ врз Палестинците во Газа.
Како шести приоритет, новиот лидер на Хамас ја наведе меѓународната заедница и Обединетите нации, од кои побара да ги заштитат Палестинците и да ги повикаат на одговорност оние што ги нарече „воени злосторници“ од израелска страна.
Ал-Хаја беше главен преговарач на Хамас во разговорите за прекин на огнот и размена на затвореници. Во годините пред тоа беше базиран во Доха, Катар. На функцијата го наследи Јахја Синвар, кој беше убиен во израелски напад во Рафах во октомври 2024 година.
За разлика од неговиот главен противкандидат Халед Машал, Ал-Хаја се смета за поблизок до Иран.
Израелската војска ја започна офанзивата во Газа во октомври 2023 година, по нападот организиран од Хамас во Израел. Според наведените податоци, во конфликтот биле убиени повеќе од 73.000 луѓе, а речиси 174.000 биле ранети, пред во октомври 2025 година да биде постигнат прекин на огнот