Продолжуваат инфраструктурните активности за подобрување на условите за работа на припадниците на Армијата и вработените во Министерството за одбрана.
Министерот за одбрана Владо Мисајловски денеска ја посети Касарната „Гоце Делчев“, каде изврши увид во градежните активности за целосна реконструкција на објектот на Директоратот за безбедност и разузнавање.
Во моментов се реализираат активности за целосно завршување на реконструкцијата и ставање на објектот во функција, согласно современите стандарди.
Со реконструкцијата се опфатени повеќе значајни зафати, меѓу кои поставување нова електрична инсталација и осветлување, систем за вентилација и греење, противпожарна и громобранска инсталација, како и промена на подните облоги и вратите.
Предвидена е и реконструкција на санитарните јазли, како и завршни градежни и фасадерски работи со цел подобрување на енергетската ефикасност на објектот.
Мисајловски посочи дека продолжуваат вложувањата во модерна и функционална инфраструктура, со цел создавање подобри услови за работа и повисоки стандарди за припадниците на Армијата и вработените во Министерството за одбрана.