Од среда, 22 април, стапија во сила новите правила на Европската Унија кои воведуваат строги контроли за патување со домашни миленици. Најголемите промени ги погодуваат сопствениците од Велика Британија, кои повеќе не можат да ги користат старите пасоши за миленици, туку мора да обезбедат посебни здравствени сертификати.
Овие измени се однесуваат на некомерцијално движење на кучиња, мачки и порове. Сопствениците кои имаат живеалиште во Велика Британија сега мора да поседуваат Здравствен сертификат за животни (AHC), кој се издава за секое патување поединечно.
„Пасошите за домашни миленици од ЕУ издадени на жители на Велика Британија пред 22 април 2026 година наскоро повеќе нема да бидат валидни документи за влез во ЕУ. Ова значи дека жителите можеби ќе треба да имаат друг документ за да го однесат своето домашно милениче во Унијата“, се наведува во новите упатства.
Цената на овие сертификати е значителен удар по џебот на сопствениците, со оглед на тоа што тие чинат од 99 до над 250 фунти, во зависност од ветеринарната клиника. Сертификатот може да се користи до шест месеци за патување во рамките на ЕУ и за враќање дома, под услов вакцината против беснило да е валидна.