Од 14 јули започнува примената на новиот Закон за игри на среќа и за забавни игри, со кој за првпат се воведува регулирана рамка за организирање подарувања (giveaway).
Со новите правила, организаторите ќе мора да обезбедат дозвола за приредување на вакви игри, да ги објават правилата и резултатите, како и да ги почитуваат утврдените рокови и услови.
Од Министерството за финансии информираат дека целта е воспоставување јасни обврски за организаторите, поголема транспарентност и поголема правна сигурност за учесниците.
„Согласно новото законско решение, за приредување giveaway задолжително ќе се издава дозвола, која се добива по поднесување барање до Министерството за финансии најдоцна 30 дена пред денот определен за започнување на играта“, посочуваат од Министерството.
За добивање дозвола, организаторите ќе треба да достават соодветна документација, меѓу која правила на подарувањето, докази за потеклото на наградите, документација за регистрација, податоци за економско-финансиската состојба и доказ за платен надоместок.
Новиот закон предвидува и плаќање надоместок за приредување на играта во висина од 18 проценти од вкупната вредност на наградниот фонд. Надоместокот треба да биде уплатен пред почетокот на играта, во рок од три дена од добивањето на дозволата.
Дополнително, правилата на играта ќе мора јавно да бидат објавени пред започнување на giveaway-от, а резултатите и добитниците најдоцна три дена по извлекувањето или определувањето на наградите.
„Правилата задолжително треба да содржат податоци за организаторот, производите или услугите што се рекламираат, условите за учество, времетраењето на играта, начинот на извлекување и определување на добитниците, вредноста на наградите, начинот на нивно доделување и постапката за приговор“, наведуваат од Министерството за финансии.
Со законските измени се дефинира и самиот поим giveaway – игра на среќа во која учеството се остварува преку активности како лајкување, тагнување, споделување или објавување содржини, а се организира за промоција на производи или услуги преку интернет, мобилни уреди или други платформи.
Од Министерството додаваат дека со новата регулатива се воспоставува единствен систем за овие активности, со јасни правила и поголема заштита за учесниците.