Купувањето на нов паметен телефон во наредните години ќе биде под влијание на новите регулативи на Европската Унија. Производителите ќе мора да исполнуваат строги правила кои гарантираат подолг век на траење на уредите и полесно сервисирање.
Главната цел на европските регулатори е да се прекине практиката на често менување на телефоните само поради ослабена батерија или пад на перформансите.
„Целта е да се намали електронскиот отпад, да се заштедат пари за потрошувачите и да се поттикнат поправки наместо фрлање на уредите“, пренесуваат медиумите.
Новите правила налагаат батериите да го задржат својот капацитет по голем број циклуси на полнење. Исто така, нивната замена ќе мора да биде едноставна и достапна за секој корисник, без потреба од специјални алати или стручна помош.
Оваа промена ќе ги опфати и iPhone и Android уредите. Иако правилата важат за ЕУ, тие најверојатно ќе влијаат врз глобалното производство, што значи дека корисниците насекаде ќе добијат поквалитетни и поиздржливи телефони.
Покрај еколошката корист, овие измени носат и директна финансиска заштеда за граѓаните, кои ќе можат подолго да ги користат своите уреди.