Грчките универзитети во петок, 16 октомври, повторно ќе се претстават пред македонските студенти на настанот „Панорама на грчките универзитети – том 2“, што ќе се одржи во Европската куќа во Скопје, со поддршка на Амбасадата на Грција во Северна Македонија.
Настанот е наменет за учениците, студентите и нивните семејства кои сакаат да се информираат за можностите за продолжување на образованието во Грција. Посетителите ќе имаат можност директно да разговараат со претставници на универзитетите, да ги разгледаат студиските програми и да добијат информации за академските насоки и можностите за професионален развој.
На настанот ќе учествуваат претставници на Националниот и Каподистриски универзитет во Атина, Универзитетот Македонија и Универзитетот Аристотел во Солун. Тие ќе презентираат додипломски програми од различни области, меѓу кои археологија, литература и античка грчка историја, применета филозофија во деловното одлучување, вештачка интелигенција и наука за податоци, сметководство и финансии, спорт и здравје, како и право.
Понудата опфаќа широк спектар на академски области, од хуманистички и општествени науки до технологија, здравство и бизнис, овозможувајќи им на заинтересираните да се запознаат со различните можности за студирање на грчките јавни универзитети.
Презентациите ќе се одржат во две сесии, од 12 до 16 часот и од 16 до 18 часот. Во текот на настанот, посетителите ќе можат да поставуваат прашања и да добијат информации директно од универзитетските претставници.
„Панорамата на грчките универзитети“ е дел од активностите на иницијативата „Студирај во Грција“, чија цел е да ги поврзе грчките високообразовни институции со потенцијалните студенти од регионот и да ги претстави можностите за високо образование во Грција.
За учество е потребна регистрација преку платформата „Студирај во Грција“, на следниот линк.