Министерот за надворешни работи и надворешна трговија, Тимчо Муцунски, денеска во Истанбул ќе учествува и ќе се обрати на Бизнис форумот Северна Македонија – Турција.
Како што соопшти Министерството за надворешни работи и надворешна трговија, форумот, организиран од владите на двете земји, ќе ги собере претставниците на институциите и бизнис-заедниците од Северна Македонија и Турција, со цел унапредување на економската и трговската соработка, привлекување нови инвестиции и создавање можности за партнерства.
На настанот се очекува учество на голем број компании од двете држави, кои ќе имаат можност да остварат Б2Б и Б2Г средби и да воспостават нови деловни контакти.
Бизнис форумот официјално ќе го отворат министерот Муцунски и турскиот министер за трговија, Омер Болат.
Во рамки на посетата, Муцунски ќе оствари и билатерална средба со Болат, на која ќе се разговара за економските односи меѓу двете земји, можностите за зголемување на трговската размена, привлекување инвестиции и натамошно унапредување на севкупната економска соработка.
Од Министерството оценуваат дека форумот претставува значајна можност за продлабочување на економските врски меѓу Северна Македонија и Турција, како и за воспоставување нови деловни партнерства меѓу компаниите од двете држави.