Со инвестиција од еден милион евра, Меѓународниот аеродром Скопје ја надгради безбедносната контрола преку воведување на два нови уреди со компјутерска томографија за проверка на рачен багаж и две автоматизирани ленти. Новата опрема е набавена од британската компанија „Smiths Detection“ и од денеска е официјално пуштена во функција.
Новите системи обезбедуваат поголема прецизност при детекција на потенцијални закани, со што значително се намалува потребата од дополнителни физички проверки на багажот.
За патниците ова значи побрза контрола и пократко време на чекање во редовите, бидејќи лаптопите, таблетите и течностите повеќе нема да мора да се вадат од торбите при процесот на скенирање.
Генералниот директор на аеродромскиот оператор ТАВ Македонија, Неџат Курт, на прес-конференција ги образложи техничките придобивки од оваа опрема.
„Се овозможува и поголем капацитет на аеродромот, односно со новата технологија ќе се обработат до двојно повеќе патници на час по линија. Ова е клучно за справување со растечкиот сообраќај, особено во шпицот на сезоната“
Според него, со оваа модернизација скопскиот аеродром се позиционира покрај големите европски и светски центри каде овие системи веќе се стандард.
Курт посочи дека овие уреди се дел од поширок инвестициски циклус, потсетувајќи дека минатата година биле имплементирани уште два безбедносни проекти вредни 1.930.000 евра.
„Сите овие инвестиции имаат една цел. Да се унапредат безбедносните процедури, да се зголеми ефикасноста и да се подигне квалитетот на услугата за секој патник“