Нов чин на саботажа е забележан на холандските железници, откако на линијата меѓу Апелдорн и Девентер беше пронајдена поставена цевка. Информацијата ја потврди холандската државна компанија за одржување и проширување на железничката мрежа „ProRail“.
Според портпаролот на компанијата, предметот е откриен во вторник вечерта во близина на Теуге, во централна Холандија, што доведе до привремено запирање на железничкиот сообраќај меѓу Девентер и Апелдорн од 21:30 часот, пренесува „NL Times“. Првично беше соопштено дека прекинот е последица на дефект во сигнализацијата.
„Полицијата и тимот за одговор на инциденти на железничкиот оператор веднаш излегоа на местото на настанот“, изјави портпаролот на компанијата „ProRail“.
Инцидентот се надоврзува на претходни слични случувања, откако претходно во текот на денот метала шипка беше отстранета од пругата меѓу Холтен и Рајзен. Во вторник наутро, железничкиот сообраќај беше сериозно нарушен во неколку провинции бидејќи на повеќе од 35 локации беа поставени цевки и кабли кои го попречија системот за следење на зафатеноста на пругите.
Од „ProRail“ соопштија дека „има многу малку снимки од камерата од саботажата, но она што го има е предадено на полицијата“.
По повод овие настани, холандската државна секретарка за инфраструктура и управување со водите, Анет Бертрам, во писмо до парламентот истакна дека саботажата е „неприфатлива“ и дека ваквите дејствија „грубо“ ја преминуваат границата.